Tuis
Ons sê NEE vir ʼn EED by skole
Die burgerregte-inisiatief AfriForum en die Centurion Jeugleiersforum het ʼn gesamentlike veldtog geloods teen die BEGINSEL dat leerders aan die aflegging van ʼn eed by skole onderwerp word, ongeag wat die bewoording daarvan mag wees.
U kan die veldtog deur een of meer van die volgende stappe steun:
- Teken asseblief ons versoekskrif: Daar is aparte versoekskrifte vir onderskeidelik skoliere en volwassenes. Die versoekskrif kan elektronies geteken word of u kan ʼn kopie van die versoekskrif druk om papierweergawes te teken en te laat onderteken;
- U kan bykomend u kommentaar rakende die eed lewer en ons sal toesien dat dit aan die minister van onderwys oorhandig word. Die minister wag tans kommentaar op die voorgestelde eed in.
Die besware van AfriForum en die Centurion Jeugleiersforum teen die eed is onder meer dat:
- Die eed die Suid-Afrikaanse Grondwet sal ondermyn: Tydens die bekendstelling van die voorgestelde eed is aangedui dat dit gebaseer is op die waardes van die Grondwet. Die instelling van ʼn eed sal egter die Grondwet en die Akte van Menseregte daarin ondermyn. Artikel 15 daarvan waarborg elkeen se reg tot vryheid van gewete, godsdiens, denke, oortuiging en mening. Die instelling van ʼn eenvormige eed sal hierdie regte ondermyn, veral in skole waar leerders onder groepsdruk onderwerp kan word daaraan om dit af te lê.
- Minderjariges moet nie aan ʼn eed onderwerp word nie: ʼn Eed is ʼn ernstige saak wat wetlik bindend is. Sou ʼn eed vals afgelê word, kom dit op meineed neer. Dit is dus uiters onverantwoordelik om minderjariges se gewetens aan ʼn eed te probeer bind, terwyl veral die jongste leerders nog nie eens die implikasies daarvan mag verstaan nie.
- Lojaliteit moet verkry word deur prestasie, dienslewering en akkommodering: Dit is normaal dat enige regering graag wil sien dat landsburgers lojaal is. Hierdie lojaliteit kan egter nie afgedwing word nie, maar moet deur ʼn regering verdien word. Die prestasie van ʼn land, die lewering van effektiewe dienste en daarstelling van ʼn klimaat in die land waar alle gemeenskappe tuis voel en geakkommodeer word, is faktore wat lojaliteit bepaal. Die regering het misluk in hierdie verband en AfriForum beskou die eed as ʼn strooihalm waarna gegryp word om lojaliteit af te dwing in omstandighede waar daar wantroue in die regering weens die elektrisiteit- en ander krisisse is.
- Kinders mag nie ʼn politieke speelbal wees nie: Suid-Afrika sukkel vandag nog om die negatiewe uitwerking van die ANC se “liberation before education“-veldtog tydens die vorige bedeling, asook ander gevalle waar kinders vir politieke motiewe misbruik is, te oorkom. Nooit weer moet ons land se kinders as politieke speelbal misbruik word vir enige ideologie nie. Die voorgestelde eed sal kinders reduseer tot politieke pionne ter bereiking van ideologiese doelwitte.
- ʼn Eed onvanpas is in omstandighede waar die onderskeid tussen party en staat onduidelik is: In politieke omstandighede waar die skeiding tussen die staat en die regerende party so onduidelik geword het in Suid-Afrika en die regerende party byna elke instelling beheer, sal die lojaliteit wat in die eed uitgespreek word, moeilik onderskeid tussen lojaliteit aan die staat en lojaliteit aan die party kan tref.